Chrita Orang Yang Chari Slamat/Deri-hal si Kristian

CHRITA ORANG YANG CHARI SLAMAT.

---

FASAL 1.

DERI-HAL SI KRISTIAN.

Bila sahya berjalan di dalam hutan, sahya datang dkat satu lobang di tanah, dan berbaring man tidor. Waktu sahya lagi tidor sahya bermimpi satu mimpi, dan dalam itu mimpi sahya tengok satu orang yang pakai pakaian burok. Dia berdiri dkat rumah-nya, ttapi sahya rasa sperti dia mau tingalkan itu rumah, kerna itu rumah di blakang-nya. Dalam tangan-nya dia pegang satu buku, dan dia ada pikul satu pikulan yang brat.^[1]

Sahya tengok dalam sahya punya mimpi itu orang ada bacha itu buku, dan waktu dia bacha dia mnangis, dan mngglitar sbab takot. T'ada brapa lama lagi itu orang bertriak kuat-kuat, "Apa sahya msti buat?"^[2]

Dngan itu macham susah hati dia pulang, ttapi dia tahankan dia punya susah dngan s-boleh-boleh-nya spaya jangan anak-bina-nya tahu. Lama-lama bertambah-tambah susah-nya, sampai dia msti chakap juga. "Wah, chlaka sahya ini," dia kata sama anak-bini-nya, "tntu sahya nanti binasa sbab satu pikulan yang terlalu brat yang sahya ada tanggong. Ini dunia nanti hangus pada hari kiamat. Dan lagi orang sudah bilang sama sahya yang negri kita tinggal ini tntu nanti hangus, kerna api mau turun deri langit dan bakarkan dia. Kalau bgitu kita smoa, laki-bini dan anak-anak kita, tntu nanti binasa kalau kita tidak lpas deri-pada itu chlaka."

Bila anak-bini-nya dngar bgitu, dia-orang punya hati terlalu-lah susah, bukan sbab dia-orang fikir briar juga sperti dia sudah chakap, ttapi sbab fikir barangkali dia

thumbless

SI KRISTIAN SAMA ANAK-BINI-NYA.

gila. Dan skarang sbab sudah malam smoa-nya minta dia lkas tidor, spaya kalau tidor lama-lama dia punya ingatan boleh ttap.

Ttapi itu malam bgitu juga itu orang punya susah, kerna dia ta'boleh tidor, ttapi dia mnangis dan dia mraong.

Pagi-pagi anak-bini-nya tanya sama dia kalau dia sudah baik, ttapi dia jawab, "Bertambah-tambah sahya punya susah." Dan dia mau berehakap lagi, ttapi smoanya ta'mau dngar, kerna dia-orang fikir kalau chakap kasar sama dia barangkali susah-nya dan ktakotan-nya boleh hilang. Orang dunia ta'boleh hiburkan hati yang susah. Kadang-kadang dia-orang tertawakan dia, kadang-kadang maki dia, kmdian skali-kali ta'mau champur sama dia. Sbab itu dia masok bilek-nya sndiri, mau minta do'a kerna anakbini-nya dngan mnangis, dan dngan susah sbab nasib-nya yang ta'baik. Kmdian dia kluar berjalan-jalan dngan mmbacha itu buku dan minta do'a. Ada brapa hari dia bgini.

Dan sahya tengok pula dalam itu mimpi, ada satu hari dia berjalan-jalan bgitu dngan mmbacha itu buku, terlbeh lagi susah hati-nya, sampai dia bertriak sperti dhulu, "Apa sahya msti buat?" Dan lagi sahya tengok itu orang pandang sana sini sperti dia mau lari di mana-mana, ttapi dia berdiri di situ juga, kerna dia ta'tahu di mana mau lari. Itu waktu sahya tengok satu orang yang bernama Guru Injil datang serta berkata sama dia, "Knapa angkau mnangis?"

Dan itu orang jawab, "Sbab sahya sudah bacha dalam ini buku yang tutu sahya msti mati, kmdian sahya msti berdiri dpan Hakim yang bsar;^[3] dan sahya rasa sahya punya hati tidak brani mati,^[4] dan sahya ta' boleh berjumpa dngan tuan Hakim."^[5]

Dan Guru Injil jawab, "Dalam ini dunia kita smoa banyak susah; bgimana angkau ta'mau mati?" "Sbab sahya takot ini pikulan yang sahya ada pikul nanti bawa sahya pergi nraka;^[6] dan jikalau sahya t'ada sdia mau masok jel, bgimana sahya brani jumpa dngan

thumbless

GURU INJIL TUNJOKKAN PINTU YANG SMPIT.

Hakim, atau trima hukuman-nya? sbab itu sahya mnangis bila sahya fikir fasal itu." Laman:Chrita.pdf/25 Laman:Chrita.pdf/26 Laman:Chrita.pdf/27 Laman:Chrita.pdf/28 Laman:Chrita.pdf/29 Laman:Chrita.pdf/30

1. Yashaya 64:6; Lukas 14:33; Mazmur 38:4.
2. Perbuatan Rasul 2:37; 16:30; Ibrani 2:2,3.
3. Ibrani 9:27
4. Ayub 16:21,22.
5. Hizkiel 22:14.
6. Yashaya 30:33.